رح فمـان الله والذمّـه مـن الذمّـه بريّـه
لا تخاف من المفارق رح عليك الله وامانـه
رح بعيد..أبعد من الدمعه على العين الخليّـه
رح بعيد.. أبعد من الشرهه على مزح الميانه
وابعد من الحلم للي خاب ظنّه فـي خويّـه
وابعد من الياس للي طاب حظه في زمانـه
لو تروح أبعد من حدود السمـا والجاذبيّـه
والله ان تبقى قريب أقرب من القلب لحنانـه
تنتشر فيني شتات جروح مثل الروح حيّـه
تختفي في كل عرق ولا فقدتك قـال عانـه
يابعد عذر الفراق اللي قبـل فرقـا الخطيّـه
يابعد ذنب الزمان اللـي قبـل عذرiالخيانـه
ليلة وداعك على كثـر الحـروف الأبجديّـه
ما لقى من ودعك حرفيـن ينطقهـا لسانـه
ليلةٍ فيها انت ماكنت انت .هي ماهيب هيّـه
ليلةٍ يكرم بها مـن حبهـا قبـل امتحانـه
قلت لي: بنساك. قلت: الله يهنيـك وهنيّـه
واحدٍ خلاك مـن ربـاك تنسانـي عشانـه
قلت لي: قلبك لاينسى قلت: ليـت القلب فيّـه
دوّره واليـا لقيتـه وصّـه وردّه مكـانـه
وص نفسك والاّ انا مانيب في حاجة وصيّـه
واعتبر فرقـاك أمانـه.. والله الله بالأمانـه